Адыгэ Республикэм и Премьер-министрэу Александр Наролиныр, АР-м и Къэралыгъо Совет—Хасэм и Тхьаматэ игуадзэу, аграрнэ политикэмкIэ, мылъкумкIэ ыкIи чIыгу зэфыщытыкIэхэмкIэ комитетым ипащэу Шъао Аскэр муниципальнэ гъэпсыкIэ зиIэ «Шэуджэн районым» кIогъагъэх, мэкъумэщ фермер хъызмэтшIапIэм ыкIи сабыибэ зэрыс унагъомэ ащыщхэм ащыIагъэх. Нэужым муниципалитетым инароднэ депутатхэм я Совет изэхэсыгъо хэлэжьагъэх, район администрацием, ащ ипащэу Аулъэ Ращыд 20I9-рэ илъэсым Iофэу ашIагъэм изэфэхьысыжьхэр къышIыгъэх.
Согласно отчету, за прошлый год доходная часть бюджета района составила почти 65,5 млн. руб. Темп роста по сравнению с показателями исполнения доходной части бюджета прошлого года составил 116,2%. Особое внимание в части финансирования было уделено использованию бюджетных средств на социально значимые статьи расходов бюджета. К ним относится заработная плата, пособия детям-сиротам, оплата за потребление энергоресурсов бюджетными учреждениями, расходы на питание в дошкольных образовательных учреждениях. Рашид Аутлев подробно рассказал об итогах в сферах сельского хозяйства, промышленности, торговли, жилищной политики, здравоохранения, молодежной политики, культуры, социальной защиты населения и других.
Представители исполнительной и законодательной власти побывали в многодетной семье в а. Пшичо и посетили фермерское хозяйство.
Пщычэу дэт мэкъумэщ фермер хъызмэтшIапIэу Элбэшэ Аслъан ием Премьер-министрэр Iухьагъ. Ащ иIофшIэн зэрэзэхищэрэр зэригъэлъэгъугъ, гумэкIыгъохэр иIэмэ кIэупчIагъ.
Аслъан ихъызмэтшIапIэ нэбгырищымэ Iоф щашIэ. Ащ щэ къэзытырэ чэм 40-м ехъу ыIыгъ. Щэм изы Iахь дагъэкIы, къуае рахы. Бысымым къызэриIуагъэмкIэ, ыIыгъ былымышъхьэ пчъагъэм тапэкIэ хигъэхъон гухэлъ иI.
— Фермерхэу езыгъэжьакIэхэрэм IэпыIэгъу афэхъурэ грантыр Элбэшэ Аслъан къыратыгъагъ. Ар егъэжьэпIэшIу фэхъугъ, — къыIуагъ Шэуджэн район администрацием мэкъу-мэщымкIэ иотдел ипащэу ГутIэ Мурат. — 2017-рэ илъэсым былымышъхьэ 27-рэ Аслъан иIагъ. Непэрэ мафэм ехъулIэу шъхьэ 70-м ехъу ыIыгъ. ТапэкIи хъызмэтшIапIэм зырагъэушъомбгъун гухэлъхэр яIэх.
ГутIэ Мурат къызэриIуагъэмкIэ, Шэуджэн районым былымышъхьэ 6270-рэ щаIыгъ. Аужырэ илъэсхэм фермерхэр грантхэм зэрахэлажьэхэрэм къыхэкIэу былымышъхьэхэм япчъагъэ хэхъо. 20I2-рэ илъэсым къыщегъэжьагъэу къэралыгъо IэпыIэгъур цIыфхэм къызIэкIагъэхьан алъэкIы. Мыгъи программэм хэлэжьэнхэу ищыкIэгъэ тхылъхэр агъэхьазырых.
Нэужым БжьашIомэ яунагъоу сабыибэ зэрысым кIуагъэх. Зэшъхьэгъусэхэу Мыхьамэтрэ Нуриетрэ лъфыгъитф зэдапIу. ЗэгурыIоныгъэмрэ лъытэныгъэмрэ зиIэубытыпIэхэу псэухэрэ БжьашIохэр 2005-рэ илъэсым щыIэныгъэ гъогум зэдытехьагъэх. Зызэдэпсэухэрэ уахътэм къыкIоцI федеральнэ программэу «Устойчивое развитие сельских территорий на 2014 — 2017 годы и на период до 2020 года» зыфиIорэм хэлэжьагъэх ыкIи сомэ миллионрэ мин 600-м ехъу ахъщэу къаратыгъ. МылъкумкIэ унэ зэрагъэгъотыгъ.
Насыпыр зэрылъ унагъом сабыитф щапIу. Анахьыжъэу Расул спортым пылъ, дзюдомкIэ зэнэкъокъухэм ахэлажьэ ыкIи текIоныгъэхэр къыдехых. Ны-тыхэр ящысэтехыпIэхэу сабыйхэр къэтэджых. ЗэдеIэжьхэзэ Iоф зэдашIэ, ягухэлъышIухэр щыIэныгъэм зэрэпхыращыщтхэм пылъых.
Шэуджэн районым инароднэ депутатхэм я Совет изэхэсыгъоу щыIагъэм 2019-рэ илъэсым администрацием, ащ ипащэ Iофэу ашIагъэр щызэфахьысыжьыгъ, пшъэрылъыкIэхэр щагъэнэфагъэх. Аулъэ Рэщыдэ илъэсым изэфэхьысыжьхэр къышIызэ экономикэм, социальнэ, нэмыкI лъэныкъохэм хэхъоныгъэхэр ашIынхэр муниципалитетым пшъэрылъ шъхьаIэу зэрэзыфигъэуцужьырэр къыхигъэщыгъ. Анахьэу анаIэ зытырагъэтырэмэ ащыщ районым щыпсэухэрэм щыIэкIэ-псэукIэшIу яIэныр. Джащ фэдэу спортым пылъынхэм пае ищыкIагъэр зэкIэ зэшIуахы. Ащ къызэриIуагъэмкIэ, бизнес цIыкIум ылъэныкъокIэ Шэуджэн районым предприятие 35-рэ ит. Ахэм нэбгырэ 301-мэ Iоф ащашIэ. Ащ нэмыкIэу унэе предприятие 516-рэ щызэхащагъ.
20I9-рэ илъэсым «Устойчивое развитие сельских территорий на 2014 — 2017 годы и на период до 2022 года» зыфиIорэ программэм къыдыхэлъытагъэу Шэуджэн районым сомэ миллион 17-м ехъу ыгъэфедагъ. МылъкумкIэ спорт псэуалъэхэр районым итхэ псэупIэхэм ащашIыгъэх, урамхэр агъэкIэжьыгъэх, нэмыкI IофшIэнхэри щагъэцэкIагъэх. Федеральнэ программэм къыдыхэлъытагъэу Пщыжъхьаблэ, Тихоново, Зарево адэт культурэм иунэхэм игъэкIотыгъэ гъэцэкIэжьынхэр ащашIыгъэх.
«Устойчивое развитие сельских территорий» зыфиIорэ программэмкIэ псэупIэу Веселэм фельдшер-мамыку IэзапIэ щашIыгъ.
Александр Наролиным гущыIэр зештэм, Адыгэ Республикэм и ЛIышъхьэ ыцIэкIэ къэзэрэугъоигъэхэм шIуфэс къарихыгъ. Ащ ипшъэрылъкIэ районым изэфэхьысыжьхэр къызэришIыщтхэр, мыгъэ нахь анаIэ зытырагъэтын фэе лъэныкъохэм къызэращыуцущтыр Премьер-министрэм къыIуагъ.
Зэфэхьысыжьхэм къызэрагъэлъагъорэмкIэ, муниципалитетым хэхъоныгъэхэр зэришIхэрэр, ыпэкIэ зэрэлъыкIуатэрэр Александр Наролиным къыхигъэщыгъ. Районыр мэкъу-мэщым зэрэфэгъэзагъэр ыкIи а лъэныкъор нахь къызэрэхагъэщырэр къыIуагъ. Муниципалитетым щыпсэухэрэр грантхэм якъыдэхын чанэу зэрахэлажьэхэрэр игущыIэ къыщыхигъэщыгъ. Мэкъумэщ хъызмэтым хэхъоныгъэхэр ышIынхэм къэралыгъо программэхэу епхыгъэхэр щыIэхэ зыхъугъэм къыщегъэжьагъэу езыгъэжьэгъэкIэ фермер 48-мэ грантхэр къаратыгъэх. Мы лъэныкъомкIэ Шэуджэн районым ятIонэрэ чIыпIэр ыIыгъ.
Бизнес цIыкIум ыкIи гурытым ахэщагъэхэм ахагъэхъон зэрэфаер Премьер-министрэм игущыIэ къыщыхигъэщыгъ. Джащ фэдэу предпринимательхэм япчъагъэ хагъэхъоныр пшъэрылъэу яIэхэм зэращыщыр къыIуагъ.
— Инвестициехэр къещэлIэгъэнхэмкIэ, предпринимательствэм IэпыIэгъу фэхъугъэнымкIэ, социальнэ, нэмыкI инфраструктурэм хэхъоныгъэхэр ышIынхэмкIэ пшъэрылъ гъэнэфагъэхэр муниципалитетым ыпашъхьэ итых, — къыIуагъ Александр Наролиным. — Пстэуми тызэдеIэжьмэ, зэфэхьысыжьышIухэм тафэкIощт.
Псауныгъэм икъэухъумэн, гъэсэныгъэм, демографием, щыIэныгъэм инэмыкI лъэныкъуабэм Премьер-министрэр къащыуцугъ, пшъэрылъхэр къыгъэнэфагъэх.
